ພູເຂົາໄຟທີ່ກຳລັງຄຸຄັວນຂື້ນ ແລະ ຫຼຸມຍຸບໂຕຈາກການລະເບີດພົ່ນລາວາ, ການດຳລົງຊີວິດຂອງຊາວກະສິກຳຕາມແບບສະບັບຂອງຍີ່ປຸ່ນ.

 

ອາໂຊະຕັ້ງຢູ່ໃຈກາງເກາະຄີວຊູ ທາງພາກໃຕ້ຂອງປະເທດຍີ່ປຸ່ນ, ເປັນຫນື່ງໃນສະຖານທີ່ທ່ອງທ່ຽວທີ່ມີຊື່ສຽງ ແລະໄດ້ຮັບຄວາມນິຍົມຫຼາຍທີ່ສຸດໃນປະເທດຍີ່ປຸ່ນ. ອະໂຊະຕັ້ງຢູ່ໃນແຂວງຄຶມະໂມະໂຕະ ເຊິ່ງມີຖ້ຽວບິນໂດຍກົງຈາກປະເທດລາວ*, ແລະໃຊ້ເວລາພຽງ 1 ຊົ່ວໂມງເດີນທາງຈາກສະຫນາມບິນຄຶມະໂມະໂຕະໄປອາໂຊະໂດຍທາງລົດ. (*ສາຍການບິນລາວມີແຜນຈະເລີ່ມໃຫ້ບໍລິການບິນໄປ-ກັບ ວຽງຈັນ-ຫຼວງພະບາງ-ຄຶມະໂມະໂຕະ ຕັ້ງແຕ່ເດືອນມີນາ 2020)

 

ອາໂຊະເປັນສະຖານທີ່ແປກທີ່ຫາຍາກ, ເມື່ອ 9ຫມື່ນປີກ່ອນ ພູເຂົາໄຟທີ່ຢູ່ຖັດຈາກພູເຂົາໄຟທີ່ກຳລັງຄຸຄັວນໃນປະຈຸບັນໄດ້ລະເບີດຄັ້ງໃຫຍ່ ແລະ ເຮັດໃຫ້ເກີດຫຼຸມຍຸບເປັນຫຸບເຂົາຂະໜາດໃຫຍ່ ເຊີ່ງປະຈຸບັນມີຜູ້ຄົນດຳລົງຊີວິດໂດຍການເຮັດກະສິກຳ ແລະ ວັດທະນະທຳ. ທ່ານສາມາດມ່ວນຊື່ນກັບທິວທັດທີ່ແຕກຕ່າງກັນໃນແຕ່ລະລະດູການເຊັ່ນ: ທິວທັດທົ່ງຫຍ້າຂຽວໃນລະດູຮ້ອນ, ທິວທັດທົ່ງຫຍ້າສູງໃນລະດູໃບໄມ້ຫຼົ່ນ(ຫຍ້າຊຶຊຶກິຂອງຍີ່ປຸ່ນ), ທິວທັດພູເຂົາທີ່ປົກຄຸມດ້ວຍຫິມະສີຂາວໃນລະດູຫນາວ, ທິວທັດພູເຂົາສີດຳທີ່ເກີດຈາກການຈູດໄຫມ້ຂອງຫຍ້າ.

 

ສີ່ງທຳອິດທີ່ທ່ານຈະສະດຸດຕາແມ່ນສາຍພູອາໂຊະໂກະກະກຸ(Asogogaku). ຮູບຮ່າງຂອງພູນີ້ຄ້າຍຄືພະພຸດທະເຈົ້າກຳລັງນອນ, ສະນັ້ນ ຈຶ່ງຖືກເອີ້ນຊື່ວ່າ ‘ພາບນິພານ’. ໃນນັ້ນຍັງມີປາກປ່ອງພູເຂົາໄຟນາກະດະເກະ (Nakadake)ທີ່ຍັງຄົງຄຸຄັວນຢູ່. ໃນເວລາມີພູເຂົາໄຟຄຸຄັວນບໍຮຸນແຮງແມ່ນສາມາດໄປເບີ່ງປ່ອງພູເຂົາໄຟ ແລະ ທ່ານຈະສາມາດເຫັນສະນ້ຳອຸ່ນສີຂຽວມໍລະກົດທີ່ສວຍງາມ, ແຕ່ເຖິງວ່າໄລຍະພູເຂົາໄຟຄຸຄັວນແຮງກໍ່ສາມາດເຂົ້າໃກ້ໄດ້ໃນໄລຍະ1-2 ກິໂລແມັດ.

 

ສານເຈົ້າອາໂຊະທີ່ມີປະຫວັດສາດອັນຍາວນານຫຼາຍກວ່າ 2000 ປີ ແມ່ນເປັນສັນຍາລັກສະແດງເຖິງຄວາມເຄົາລົບນັບຖື ແລະ ຮູ້ບຸນຄຸນຕໍ່ ພະເຈົ້າຂອງຍີ່ປຸ່ນສະໄຫມບູຮານ ແລະ ປ່ອງພູເຂົາໄຟອາໂຊະ ເຊິ່ງປະຈຸບັນຜູ້ຄົນຈຳນວນຫຼາຍໄດ້ມາຢ້ຽມຊົມ ແລະເຄົາລົບບູຊາ.

 

ນອກຈາກນັ້ນ, ບໍ່ນ້ຳຮ້ອນທີ່ອ້ອມຮອບພູເຂົາໄຟກໍມີຊື່ສຽງເຊັ່ນກັນ. ລັກສະນະຂອງບໍ່ນ້ຳຮ້ອນຈະແຕກຕ່າງກັນໄປຕາມແຕ່ລະສະຖານທີ່. ທ່ານຈະສາມາດມ່ວນຊື່ນກັບວັດທະນາທຳການອາບນ້ຳໃນບໍ່ນ້ຳຮ້ອນທີ່ເປັນເອກະລັກສະເພາະຂອງຍີ່ປຸ່ນ.

 

ນອກຈາກນັ້ນ, ອາໂຊະຍັງມີຊື່ສຽງໃນຖານະເປັນດິນແດນທີ່ມີຄວາມອຸດົມສົມບູນໄປດ້ວຍນ້ຳ. ນ້ຳທີໃຊ້ໃນຊີວິດປະຈຳວັນທັງຫມົດແມ່ນນຳໃຊ້ນ້ຳໃຕ້ດິນ, ເຊິ່ງນີ້ແມ່ນສີ່ງທີ່ທ່ານສາມາດເຂົ້າໃຈໄດ້ເຖິງຄວາມອຸດົມສົມບູນນັ້ນ. ນ້ຳໃສ, ນ້ຳແຮ່ທີ່ອຸດົມສົມບູນ, ນ້ຳລິນຂອງອາໂຊະແມ່ນສະຖານທີ່ທີ່ທ່ານຕ້ອງໄປຢ້ຽມຊົມ.

 

ອາໂຊະແມ່ນມີການກະສິກຳທີ່ອຸດົມສົມບູນ ແລະ ມີອາຫານທີ່ແຊບ. ຊີ້ນງົວແດງ, ເຫຼົ້າສາເກະທີ່ນຳໃຊ້ ນ້ຳແຮ່ໃນການຜະລິດ, ມ່ວນຊື່ນກັບການຊິມມິໂຊະໃນຮູບແບບການນັ່ງປີ້ງອ້ອມເຕົາໄຟແບບຍີ່ປຸ່ນບູຮານ, ຜັກດອງທີ່ເຮັດຕາມສູດດັ້ງເດີມທີ່ສືບທອດກັນມາ. ອາຫານຫຼາກຫຼາຍທີ່ທ່ານສາມາດກິນໄດ້ແຕ່ຢູ່ອາໂຊະເທົ່ານັ້ນ.

 

ຫວັງວ່າທ່ານຈະມ່ວນຊື່ນກັບປະສົບການ, ການຮຽນຮູ້, ຊິມລົດຊາດທີ່ທ່ານບໍ່ສາມາດລືມໄດ້ຂອງທຳມະຊາດອາໂຊະ.

 

 

 

ຄວາມຮູ້ພື້ນຖານກ່ຽວກັບຍີ່ປຸ່ນ

 

ຊື່ທາງການ ປະເທດຍີ່ປຸ່ນ (ເມືອງຫຼວງ ໂຕກຽວ)
ສະຖານທີ່ທ່ອງທ່ຽວຫຼັກ ໂຕກຽວ, ກຽວໂຕ, ຮອກໄກໂດ, ໂອກິນາວາ, ອາໂຊະ
ພາສາ ພາສາຍີ່ປຸ່ນ
ສາດສະຫນາ ບໍມີສາດສະຫນາ (63%), ສາດສະຫນາພຸດ (32%), ສາດສະຫນາຊິນໂຕ (3%), ສາດສະຫນາຄຣິສຕຽນ (1%), ອື່ນໆ
ເວລາ ເວລາມາດຕະຖານໂລກ +9 ຊົ່ວໂມງ (ເວລາລາວ + 2 ຊົ່ວໂມງ)
ເງີນຕາ ເງີນເຢັນ ( JPY)
ແຮງດັນໄຟຟ້າ 100 V(50/60 Hz)

 

. ປະເທດຍີ່ປຸ່ນມີຄວາມປອດໄພສູງ, ເປັນປະເທດທີ່ມີເຕັກໂນໂລຊີທີ່ທັນສະໄຫມ. ນ້ຳປະປາສາມາດດື່ມໄດ້.

. ກໍລະນີເດີນທາງມາທ່ອງທ່ຽວທີ່ປະເທດຍີ່ປຸ່ນ ຈຳເປັນຕ້ອງມີວີຊາພັກເຊົາໄລຍະສັ້ນ (ສາມາດພັກເຊົາໄດ້ພາຍໃນ 90 ວັນ)

ຂໍ້​ຄວນ​ລະວັງ​ໃນ​ການ​ຍື່ນຂໍ​ວີ​ຊາ​ຍີ່ປຸ່ນ​ຂອງ​ຄົນ​ລາວ

.ການບິນລາວ

 

ແຜ່ນພັບ


ອາໂຊະ [PDF 4.66MB]